Самбо боюнча дүйнө чемпиондорубуз

Самбо - СССР убагында дзюдо жана жиу-житсунун негизинде түптөлгөн спорт түрү. Азыркы учурда дүйнөдөгү эң белгилүү жекеме-жеке түрлөрүнө кирет. Спорттук самбо дзюдого окшош болсо, күжүрмөн самбо ММАга жакын. 
1991-жылдан бери Кыргызстандын атынан спорттук же күжүрмөн самбо боюнча дүйнө чемпиону аталган 5 адам бар. Ошол чемпиондорубуз менен тааныштыра кетели.
 

Жамалбек Асылбек уулу
2023-жылы Армениянын башкалаасында Жамалбек спорттук самбонун 88 кг салмагында дүйнө чемпиону аталган. Мелдештин жүрүшүндө ал гондурастык, түркмөнстандык, беларустук, армениялык жана казакстандык самбочуларды жеңген. Ошондо спорттук самбо боюнча курамабыз 1 алтын, 1 күмүш, 1 коло менен командалык эсепте Орусиядан кийин эле 2-орунду ээлеген.
 

Дайырбек Карыяев
2022-жылы самбо боюнча дүйнө чемпионаты Бишкекте өткөн. Анда самбочуларыбыз 2 алтын алып, жалпы командалык жыйынтыкта 2-орунду ээлеген. 2 алтындын бирисин Дайырбек алган. Ал күжүрмөн самбонун 79 кг салмагында ат салышкан. Атаандаштары египеттик, орусиялык жана казакстандык самбочулар болгон. Азыркы учурда Дайырбек АКШда жашайт, ошол жакта машыгат.

Бекболот Токтогонов
Кыргызстанда 2022-жылы өткөн дүйнө чемпионатында спорттук самбонун +100 кг салмагында Бекболот алтын тагынган. Анда ал латвиялык, сербиялык, түркмөнстандык жана монголиялык спортчуларды жеңген. Негизи эле Бекболот өтө уникалдуу балбан, ал дзюдо, кыргыз күрөш, самбо, кураш, эркин күрөш боюнча катышып, ар биринде жакшы ийгиликтерге жеткен. 2024-жылы кураш боюнча Дүйнөлүк Күжүрмөн Оюндарынын чемпиону болгон.

Бекназар Раимкул уулу
2017-жылы Орусиянын Сочи шаарында өткөн дүйнө чемпионатында Бекназар күжүрмөн самбонун 74 кг салмагында чемпион аталган. Мелдештин жүрүшүндө ал түркмөнстандык, өзбекстандык, марокколук жана орусиялык спортчуларды жеңген. Ошол жылы күжүрмөн самбочуларыбыз 1 алтын, 2 күмүш жана 2 коло алышып, командалык жыйынтыкта 2-орунду ээлеген.


 

Дмитрий Заболотный
2006-жылы Өзбестандын борбор шаарында күжүрмөн самбо боюнча дүйнө чемпионаты өткөн. Анда 100 кг салмак даражасында Кыргызстандын атынан чыккан калининграддык самбочу Дмитрий Заболотный чемпион аталган. 2008-жылы Дмитрий Орусиянын атынан чыгып дагы бир алтын алган. 2 жыл мурда ал спортчу Кыргызстан жарандыгын алды деген маалымат чыккан. 

✔Булак - wikipedia, sambo.ru, sambo.sport, chronicles.media