“Баары бир багынбайт элем” - Руслан Касымалы уулу

Руслан Касымалы уулу менен маек. Ал ММА мушкери, OCTAGON уюмунун 61 кг салмактагы учурдагы чемпиону. Рекорду 10-0. Ихлас спорт клубунун өкүлү жана Ала-Бука районунун Өрүктү-Сай айылынын кулуну.
 

- Руслан, сенин беттештериңи көрүп, ырахат алабыз, себеби сенде IQ дагы жогорку деңгээлде

- Жоок, биз эми чыгып келаткан мушкерлерге киребиз, көп нерсе үйрөнүш керек, өнүгүү багыттары көп али.

- Кайсы спорттон баштагансың негизи?

- Менин базам - бокс. Кызыгуум айылда эле башталган. Зал ачыла электе деле, өзүм ар түрдүү шаймандарды жасап, машыгып жүрчүмүн. Анан бир жездем айылга келип, зал ачкан. Ошондо бокс боюнча машыгып баштаганмын.

- Ошон үчүн колдоруң жакшы иштейт экен да, жеб жана хук соккуларың сонун го

- Ооба колум жакшы иштээри шаарга келгенде эле байкалган. ММА боюнча ышкыбоздор арасы айлампа мелдештерде туруу абалында эле көбүн кол менен жеңип алчумун. Күрөшүм жок болчу ал убакытта. Алгачкы кесипкөй беттештерде мисалы, кол менен гана иштечүмүн. Кийин көбүрөөк күрөшүп калдым. Негизи менин оң колум оор эле, бирок көп колдонбойм.

- Сен башынан баштап эле ММАга кызыккансыңбы, же алгач боксчу болом дейт белең?

- Башынан эле боксту ММАга кызыкканым үчүн баштаганмын. Бостон Анарбаев деген мушкер байке бар айылыбыздан, ошону көрүп кызыкканмын. 2019-жылы шаарга келгенде эле Бостон байке мени Ихлас клубуна алып келген.

- Азыр сенин күрөшүң жогорку деңгээлде экенин беттештерден көрсөк болот

- Залда баары эле күрөшүшөт да, ошолор менен иштеп жүрүп, күрөш өзүнөн өзү эле коюлуп калды. Меники такыр эле жок болчу күрөшүм, азыр деле өтө жакшы деп айта албайм, бирок коркпой күрөшө берем.

- Акыркы беттеште Баир Штепинди биринчи раундда керемет жамбашка чаптың, ошону атайын даярдадың беле?

- 1-раундда күч көп болот да, кармап көрсөм алым жетчүдөй сезилди. Ыргытып көрөйүн деп ыргытсам, ошондой болуп мойну менен түшүп калды.

- Бут менен ичке, башка көп теппейт экенсиң

- Ооба бут менен иштебейм мен. Кээде лоукик тээп коём, бирок көбүнчө кол менен эле күрөш.

- Чет жактарга машыгуу жыйындарына баргансыңбы?

- Ооба, Дагестанга барганмын.

- Биз менен кандай айырмалар бар экен?

- Деңгээли бөлөк да эми. Бүт адамдар залга барышат, атам теңдүүлөр да машыгып жүрөт, урушпаса да, ден-соолугу үчүн тердеп, кыймылдап коёт. Күчтүү машыктыруучулар көп, жакшы система коюлган.

- Эң оор беттешиң кайсы болгон?

- Акыркы беттешим оор болду. Биринчи жолу 5 раунд уруштум. Баары бир башкача болот экен. 3-раунддан кийин Адилет байке колуму ушалап атканда чарчаганым кадимкидей сезилди. Бирок оюмду жыйып, аттиң болуп калбасын деп, белимди бекем байлап уланттым.

- OCTAGON уюмунда биринчи беттеште тажик мушкери сени муунтуу ыкмасына жакшы алгандай көрүнгөн, анда көп кыйналган эмессиңби?

- Ооба, Амирхон Атаханов ошондо жакшы эле алган, бирок баары бир багынбайт элем, ал жерден чыгыш керек болчу. Уктасам уктайм же колу чарчаганда чыгып кетем дегем.

- Кайруу, муунтуу ыкмаларды көп эле билесиңиби?

- Билем, бирок көп колдонбойт элем. Ошону да айтып атышат, залдагы агаларым, оң келип калса, тартып коюш керек деп. Эми-эми баштадым, ошолордун үстүндө да иштеп, бир-эки негизги ыкманы коюп, спаррингдерде сезип, тартып көрүп. Менде азыр сабмишн менен бир эле жеңишим бар. Азыр бирок машыгып атам ошол багытта дагы.

- Кооптуу учурлар болгонбу карьераңда, катуу сокку жеп калып же у.с.?

- Кудай сактасын, ушул убакытка чейин оор сокку өткөрө элекмин же чарчап, бирөөнүн астында жатып кала элекмин. Ошондой болбосун деп дагы функционалдык даярдыкка да көп басым кылам. Футбол да көп ойноп турам.

- Башка кайсы спорт түрлөрүнө кызыгасың?

- Спорттун көбүнө эле кызыгам. Футбол, волейбол, теннис ойнойм. Эркин күрөшкө да кызыгам, көрүп турам.

- Хоббилериң барбы? Кино, баня…

- Киного көп кызыкпайм, баняга көп барам, спортчуларга пайдасы көп да, организмди калыбына келтирет. Кээде тоого чыгып, ат минип жүргөндү жактырам. Бирок негизи спорт эле, спорт менен жашайбыз.

✔Булак - kyraan.kg