Кубанычбек Айбек уулу

Кубанычбек Айбек уулунун топ 3 жеңиши

Author
Кыраан командасы

15 январь 2025 14:26

Кубанычбек Айбек уулу көзгө басар кыргыз дзюдочуларынын бири. Дүйнөлүк рейтингде азыр 28-орунда. Карьерасынын башында -60 кг салмакта күрөшүп жүрүп, кийинчерээк -66 кг даражасына өткөн. 
Кубанычбек бир нече жолу дзюдо коомун дүрбөлөңгө салып, укмуш жеңиштерге жеткен. Ошолордун эң алдынкы 3 жеңишине көз салалы.
 

Алгачкы Гран Слам чемпиону (-66)
2023-жылы Тбилисиде Кубанычбек Айбек уулу Гран Слам мелдешинин чемпиону аталган алгачкы кыргыз дзюдочусу болду. Мелдештин жүрүшүндө 1/16 баскычта кубалык атаандашын жеңип, 1/8 баскычта белгилүү Виллиан Лиманы контр-чабуулда иппон кылып, чейрек финалда грузиялык атаандашын вазари менен жеңип, жарым финалга чыккан. Ал баскычта мелдештин фаворити болгон Важа Маргелашвили менен күрөштө кармаш алтын упай бөлүгүнө өткөндө Кубанычбек өзүнүн негизги ыкмасы (томоэ нагэ же бросок через голову) менен вазари алып, жеңген. Финалда тажрыйбалуу монголиялык Басху Ёндонпэрэнлэйнди тез эле бутун чалып иппон кылып койгон.

Тбилиси ГС 2023 66 кг
 

Азия жана Океания чемпионатында 3-орун (-60)
2021-жылы Азия жана Океания чемпионаты Бишкекте өткөн. Анда биздин дзюдочуларыбыз 2 медал алган, анын бирөөсү - Кубанычбек Айбек уулунун колосу. 
Кубанычбек 1/8 баскычта түркмөн дзюдочусун жеңгенден кийин чейрек финалда дзюдо дүйнөсүнө атагы чыккан Елдос Сметов менен кез келген. 15 мүнөткө созулган кооз беттеште экөө тең бирден вазари алган, бирок жыйынтыгында Кубанычбек жеңүүчү болуп чыккан. Бул кармаш ташка тамга баскандай көпчүлүк дзюдочулардын эсинде калган. Андан кийин жарым финалда тайвандык дзюдочуга жеңилип, коло үчүн беттеште өзбек дзюдочусун жеңип алган.
 

Юниорлор арасы Азия чемпиону (-55)
2018-жылы Ливандын башкалаасында юниорлор арасы Азия чемпионаты өткөн. Анда Эрлан Шеров менен Айбек Кубанычбек уулу чемпион аталышкан. Кубанычбек 1/8 баскычта ОАЭлик атаандашын хансоку менен, чейрек финалда өзбекстандык Хасан Ботировду иппон менен, жарым финалда казакстандык Дамир Болатбековду иппон менен жеңип финалга чыккан. Финалда да индиялык дзюдочуну иппон менен жеңип мелдештин алтын медалын багындырган.
 

Кубанычбек Айбек уулу эчак эле кыргыз дзюдосунун тарыхына алтын тамгалар менен  жазылып калган. Бирок, биз дагы да чоң жетишкендиктерди күтөбүз.
 

✔Булак - Youtube, ijf.org