Кесипкөй боксунун өткөн 2 аптадагы урунтуу учурлары. Иноуэ, Смит, Пачеко

Кыраан командасы

27 январь 2025 16:05

Бул чыгарылышта өткөн 2 аптадагы биздин көңүлүбүздү тарткан үч беттеш жөнүндө сөз кылабыз.

Наоя Иноуэ (29-0, 26 КО) Е Джун Кимди (21-3-2, 13 КО) 4-раундда нокаут менен жеңип, WBA, WBC, WBO, IBF жана The Ring курларын ийгиликтүү коргоп алды. Эки боксчу тең 1-раундду шашпай, бири-бирин байкап өткөрүштү. Экинчи раундда Наоя дароо басым кылып, көп соккуларды жеткире баштады. Үчүнчү раундда Е Джун бир-эки жакшы тийди, бирок Наоя баары бир басым кылып, көбүрөөк сокку жеткирди, корпуска да иштеп жатты. 4-раундда Наоя активдүүлүгүн дагы көбөйтүп, корпуска оор сокку жеткиргенин сезгенден кийин аркасынан түшүп, эки сокку сериясын узатты. Жеб-кростон кийин Е Джун жыгылып, калыс эсептегенче тура албады. Беттештин урунтуу учурлары сайтыбызда бар.

55 кг WBA, WBC, WBO, IBF жана The Ring курларына
✅ (Ч.) Наоя Иноуэ (29-0, 26 КО), Жапония
🤙 4-раунд, нокаут
❌ Е Джун Ким (21-3-2), Түштүк Корея

Канело Альварестин салмагындагы жаңы жылдызга айланып бараткан жеңилбес боксчу Диего Пачеко Стивен Нельсонго биринчи жеңилүү ызаасын тарттырды. Азыр WBO рейтингинде Альварестен кийин эле турган Диего атаандашын дээрлик эки эсе көп уруп, калыстардын бирдей чечими менен жеңди. Үчөө тең беттешти 117-111 деп эсептеди. Диего 7-раундда мөөнөтүнөн эрте жеңгенге жакындаган, бирок ашыкпады.

76 кг
✅ Дигео Пачеко (23-0, 18 КО), АКШ
🤙 бирдей чечим
❌ Стивен Нельсон (20-1), АКШ

Дагы бир жеңилбес мушкер Далтон Смит атаандашын 1-раундда эле ТКО менен жеңип алды. Англиялык Далтон франциялык Валидке алгачкы секунддардан эле оор соккуларды жеткирип жатты. Кезектеги соккудан кийин Валид чайкала кетти, Далтон жарылып уруп баштаганда Валид жыгылды, калыс эсептегенче, кайра турду. Бирок сол хуктан кийин Валид дагы жыгылып, калыс беттешти токтотту. Бул Валиддин алгачкы мөөнөтүнөн эрте жеңилүүсү болду.

63.5 кг
✅ Далтон Смит (17-0, 13 КО), Улуу Британия
🤙 1-раунд, ТКО
❌ Валид Уизза (19-3, 8 КО), Франция