Бексултан Абдыкалил уулу - жылдын ачылышы

Бир нече күн мурун көк бөрү федерациясы “жыл мыктысы” сыйлыктарын ыйгарды. Анда “жылдын ачылышы” наамына Достук командасынын оюнчусу Бексултан Абдыкалил уулу ээ болду. Кезектеги чыгарылышыбызда дал ушул улакчынын быйылкы жетишкендиктерин жана карьерасын талдап көрөлү.
 

Бексултан азыр 24 жашта, бою 182 см. Командалык көк бөрүнү алгач 2023-жылдагы Президенттин кубогунда экинчи лигада ойноп баштаган. Анда “Ош шаары” командасына чапкан. Жыйынтыкта ал команда экинчи орунга ээ болгон. 2024-жылдын башында Ош облусунун райондор аралык чемпионатында Өзгөн районунун курамында ойноп, мелдештин мыкты чабуулчусу наамын алган. Андан соң Достук командасына кошулган.

Өзүнүн үчүнчү көк бөрү мелдешинде эле жогорку лигада ойноп баштаган каарманыбыз Достуктун курамында Малыш аргымагын минип, ортого чыгып калган. 
Негизи Бексултан студенттик кезде башка күжүрмөн спорт түрлөрү менен көп машыккан. Мисалы, ММА, грепплинг, күжүрмөн самбо боюнча мелдештерге катышып, байгелүү орундарга да ээ болуп жүргөн. Бирок азыр Бексултан жоон билек улакчы, Достуктун жекеме-жекечиси жана чабуулчусу, улуттук курама команданын мүчөсү катары таанымал болуп калды.

Бексултандын Достуктун курамындагы алгачкы мелдеши быйылкы Нооруз кубогу болду. Анда ал 4 оюн өткөргөн, 27 жолу жекеме-жекеге чыгып, 9 жолу эле жеңилген. Калгандарында улакты өзү алып чыккан же тең чыгышкан. Жана ошондой эле 3 салым салган. Анын экөөсүн ортону жеңип чыгып салган, бирөөсүн чабуулда улакты эңип барып салган. Жыйынтыгында Достук 2-орунду алган, бирок финалдык оюнда Бексултан Абдыкалил уулу Малыштын үстүндө Нооруз Раатбек уулу - Аватар тандемине өтө жакшы туруштук берген.

Андан кийинки мелдеши 2024 Жеңиш кубогу болду. Анда Бексултан 3 оюн өткөргөн, 24 жолу жекеме-жекеге чыгып, 11 жолу алдырган. Бирок эки жолу алдырган улакты тегеректен чыгып эле тартып алган. Калганында улакты өзү алып чыккан же тең чыгышкан. Негизи ортодо деле атаандашы улакты эңип, такымына бекем баса электе улакты тартып алган учурлары аз эмес. Негизи Бексултан ал кубокто 4 салым салган. Экөөсүн ортону жеңип чыгып, бирөөсүн атаандашынан улакты тартып алып, бирөөсүн чабуулда өзү эңип барып салган.

Ошол эле мелдеште Достук командасы 3-орунга Намыс командасы менен ойногон. Негизги жана кошумча тайм тең чыгып, оюн булиттер сериясына өткөн. Анда чечүүчү жупта каарманыбыз өзү ийгиликтүү чабуул жасап, коргонуу кезегинде өтө кооз сейв жасаган. Атаандашы тайказанга улакты таштап, бирок тайказанга жете электе Бексултан атынан жыгылып улакты илип кеткен. Ошентип ал Достук үчүн байгелүү орунду камсыз кылган.

Жайында Бексултан Абдыкалил уулу көк бөрү боюнча улуттук курама командага кирип, машыгуу жыйындарга катышкан. Сентябрда болсо Астанада бешинчи Дүйнөлүк Көчмөндөр Оюндарында элибиздин намысына жараган. Анда көк бөрү командабыз ишенимдүү түрдө чемпион аталган. Бексултан 5 салым салган, экөөсүн Казакстан менен болгон финалдык оюнда ишке ашырган.
Негизи Бексултан билегинин күчү, өжөрлүгү жана чеберчилиги менен кооз оюндарды көргөзүп келет.

✔Булак - улакчы, youtube, https://kokboru.net/